Veb sayt üzərindən müştəri əldə etmək istədiyinizi çox yaxşı bilirik. Amma onu da bilirik ki, bazarda 90%-dan artıq xidmət səhifələri heç də ürəkaçan deyil. Veb saytınızda yer alan xidmət səhifələri sizin potensial müştəriylə tək tərəfli danışdığınız yeganə səhifədir. O səhifədə siz potensial müştərini razı salmalısınız. Bunun üçün də sizə düzgün şəkildə yazılmış xidmət məzmunu lazımdır. 

Bəs, xidmət bölmələri üçün düzgün məzmunu necə yazmaq olar? Bu yazıda az da olsa, izah etmişik.

Müştəriləriniz kimdir?
Veb saytınız üçün xidmətlər bölməsini yazmadan öncə müştərilərinizin kim olduğunu bilməlisiniz. Bu sizə imkan verir ki, mesajınızı düzgün auditoriyaya onların dilində çatdırasınız. Auditoriyanızı tanımadan hərəkət etmək həm vaxtınıza, həm əziyyətinizə, həm də peşəkarlığınıza mənfi təsir göstərir.

Məsələn, müştərilərinizin nə istədiyini dəqiqləşdirmək üçün özünüzə bir neçə sual verə bilərsiniz:

- Onları motivasiya edən nədir?
- Hansı problemləri var?
- Problemin həllini nədə görürlər?
- Sizin xidməti niyə seçməlidirlər?

Bu tip suallardan yola çıxaraq, yazacağınız məzmunu daha yaxşı anlamış olursunuz.

Xüsusiyyətlər və üstünlüklər
Monoton yazılmış xidmət mətnlərini oxumaq çox sıxıcıdır. Mətnlərinizi daha maraqlı və oxunaqlı etməyin yolları isə çox sadədir. 

Yazacağınız xidmət barədə mütləq şəkildə onun xüsusiyyətlərini və üstünlüklərini qeyd etməlisiniz. Oxuyucuya lazım olan da bunlardır. Əgər mətn içərisində xüsusiyyətlər və üstünlüklər yoxdursa, müştəri nə oxuduğunu belə anlamayacaq.

Xidmət üstünlüklərinin mətndə yer alması sizə bir çox nöqtədən üstünlük gətirir. Məsələn, müştəri tam olaraq nəyə pul xərclədiyini anlayacaq. Çünki sadaladığınız üstünlüklər onun probleminin həlli ola bilər. 

Əsas problem
Xidmətdən istifadə etmək istəyənlərin hər zaman bir problemi olur. Bu problem onları xidmət almaq üçün hərəkətə gətirir.

Xidmət səhifəsini elə formada yazmaq lazımdır ki, problem birbaşa üzə çıxsın. Xidmət göstərdiyiniz sahəni dərindən bilirsinizsə, orada olan problemlər sizə tanışdır. Məzmun yazarkən daima müştərilərin hansı problemlərlə üzləşdiklərini və bu problemin həllinin nədə olduğunu izah edin. 

Yazı tonunuzu düzgün təyin etmək də bu işin bir parçasıdır. Xidməti izah edərkən, çalışın “biz”, “mən” və s. kimi tək yönlü cümlələrdən istifadə etməyin. Cümlələrinizdə xitab forması olaraq “siz” sözündən istifadə edin. Belə olan halda müştəri oxuduğu yazıda səmimiyyəti hiss edəcək. Bu da sizə qarşı etibar yaradacaq. 

“Bullet points”
Heç kim əvvəldən axıra düz yazı oxumağı sevmir. O yazının içərisində mütləq şəkildə qısa izahlar da yer almalıdır ki, diqqəti cəlb etsin.

“Bullet points” dediyimiz özəllik də tam budur. Məsələn, siz xidmətin xüsusiyyətlərini və ya faydalarını bu formada yazsanız, daha yaxşı oxunar.

Tutaq ki, boya satırsınız. Xüsusiyyətləri cümlə şəklində deyil, qısa və alt-alta yazmanız daha uyğundur.

- Xüsusiyyət 1
- Xüsusiyyət 2
- Xüsusiyyət 3

Bu həm də sizə imkan yaradır ki, saytınızın xidmət bölməsini uğurlu formada SEO-ya uyğun hazır edəsiniz.

Şəkil
Elə bilirsiniz yalnız balaca uşaqlar şəkilli yazıları sevir?

Əlbəttə ki, xeyr.

Oxuyucular hər zaman vizual görüntülərə önəm verirlər. Şəkillər bir məzmunun onurğa sütunudur. Şəkilsiz məzmun ağ-qara fonda çəkilmiş film kimidir. Çox insan rəngli filmi kənara atıb, ancaq ağ-qara görüntü izləməz.

Hə, yazılarınıza necə gəldi şəkil də yerləşdirməməlisiniz. Şəkillər xüsusi diqqətlə seçilməli və xidmətə uyğun olmalıdır. Yazını oxuyan müştəriyə o xidmətin görüntüsünü göstərməlidir. Şəkillərin bir digər faydası SEO üçün lazım olur. SEO-ya uyğun yazılarda mütləq vizuallar olmalıdır. Bir digər məqam isə şəkillərin oxumağa kömək etməsidir. Oxuyucu tam mətn yerinə, düzgün şəkildə qurulmuş mətn strukturu görəcək və oxuduqca yorulmayacaq.

Jarqonlar
Xidmət izahlarını sıxıcı etməyin ən yaxşı yolu jarqonlardan istifadə etməkdir. Bəs sual olunur. Xidmət səhifənizi sıxıcı etmək istəyirsinizmi? Əgər “xeyr” deyirsinizsə, o zaman jarqonlardan uzaq durun.

Jarqonlar bir sahəyə aid çox spesifik sayılan terminlərdir. Bunu o sahənin mütəxəssisindən başqa heç kim anlamayacaq. Müştələrinizin sizin mesajı anlamırsa, nə mənası var onlara mesaj yazmağın?

Cümlələrinizi qısa və sadə dildə yazın. Hər zaman müştərilərin anlayacağı sözlərdən istifadə edin. Akademik cümlələrdən və jarqonlardan istifadə etməyin. Bu sizi həm satışlardan, həm də saytın effektivliyindən məhrum edəcək.

Spesifik
Xidməti açıqlayarkən spesifik olmağa çalışın. Müştərinin mesajınızı daha detallı anlaması üçün spesifiklik çox vacibdir.
Uzun cümlələri, ümumi anlayışları və hamının gündəlik eşitdiyi formada olan cümlələri müştəri oxumaq istəmir. Müştəri istəyir ki, spesifik olaraq məna görsün mesajda.

Məsələn, sizə iki nümunə göstərək:

1.“Hər zaman effektiv xidmət göstərməyə hazırıq” yerinə, “Problemlərinizi və suallarınızı 24 saat cavablandırmağa hazırıq” yazın.

2.“Şirkətlərə bu işləri görmələrində kömək edirik” yerinə, “5 ildir ki, 100-dən artıq şirkətə bu dəyəri qatmışıq” yazın.

Bu tip yazı formaları müştərilərinizdə etibar yaradır. Və sizi daha peşəkar göstərir. 

CTA (Call to Action)
CTA xidmət izahınızın sonunda sizə “traffic” gətirəcək funksiyadır.
Müştəri bir xidməti oxuyandan sonra onu hərəkətə gətirəcək düymə lazımdır. Bu da CTA-dır. Məsələn, müştəri xidmətin izahından razı qaldı və bu xidmətdən faydalanmaq istəyir. Nə etməlidir? Saytda itib-batmaması üçün xidmət səhifəsini sonunda “Bizimlə əlaqə”, “Zəng et”, “Xidmətdən faydalan” kimi düymələr yerləşdirə bilərsiniz. Müştəri fikrində qətidirsə, oraya klik edib sizinlə əlaqə saxlayacaq.

Qısacası, bir xidmət səhifəsinin yazılması çox diqqət tələb edir. “Xidmət səhifəsidir”,- deyib keçmək, sizə heç bir fayda verməyəcək. Saytda yer alan hər bir məzmunun məqsədi olmalıdır. O məqsədi dəqiqləşdirmək üçün də məzmunu texniki cəhətdən düzgün yazmaq lazımdır.