May ayından ABŞ-ın qara siyahısına düşən Huawei bu gün (19.15.2019) Google sistemi olmayan ilk smartfonunu təqdim edəcək. Almaniyanın Münhen şəhərində təqdim olunacaq Huawei Mate 30-un Android əməliyyat sistemində çalışacağı bildirilir. Lakin Google Play Store, Youtube, Gmail və Google Map tətbiqlərindən istifadə mümkün olmayacaq. Həmçinin Google Map ilə əlaqəli çalışan bir neçə proqram da yeni smartfonda çalışmayacaq.
Gəlirinin 50%-ini smartfon və digər məhsullardan əldə edən Huawei şirkətinin yeni məhsulu beynəlxalq müştərilər üçün o qədər də maraqlı olmaya bilər. Statistik göstəricilərə də nəzər salanda görmək olur ki, ABŞ-ın qadağasından sonra Huawei markalı smartfonların satışı 40% azalmışdır.
Huawei avqust ayında Harmony OS adlı öz əməliyyat sistemini təqdim etməsinə rəğmən hal-hazırda smartfonlarda bu sistem tətbiq edilmir. Şirkətin verdiyi açıqlamada bildirilir ki, bu sistem hələ ki yalnız smart televizor və digər məhsullarda istifadə ediləcək.
Beynəlxalq ticarət sərgisində ətraflı açıqlamadan yayınan Huawei şirkətinin müştərilərlə əlaqələr şöbəsinin rəhbəri Richard Yu bildirmişdir ki, Google tətbiqlərini yeni smartfona rahatlıqla yükləmək mümkün olacaq.
Mütəxəssislərin fikrinə görə Google xidmətləri olmayan smartfonun satışını gerçəkləşdirmək bir o qədər də asan olmayacaq. Hətta Google proqramlarını sonradan əlavə etmək mümkün olsa belə bu, satışa bir o qədər də təsir etməyəcək.
Bəs Huawei Mate 30 başqa hansı yenilikləri özündə birləşdirir?
Smartfonun təkmilləşdirilmiş kamera ilə təqdim olunması gözlənilir. Mediaya sızan məlumata görə Edge ekrana keçid edən Huawei yeni smartfonlarında kameranı ekranın aşağısında yerləşdirməyi düşünür.
Ekran ölçü və görüntüsünün (resolution) 6.5 inç/1080 x 2340 piksel olacağı təxmin edilir. Həmçinin iddialara görə yeni smartfon 6 GB RAM və 128 GB daxili yaddaşa sahib olacaq.
Almaniyada Huawei Mate 30 ilə yanaşı həmçinin şirkətin Watch GT2 adlı smart saatının da təqdim olunacağı gözlənilir. Mediaya sızan məlumatlarda Watch GT2 445 mAh batareya gücündə olmaqla birlikdə optik ürək döyüntüsünü qeydə alacağı bildirilmişdir. Həmçinin Watch GT2 Harmony OS əməliyyat sistemi ilə təmin edilən ilk Huawei məhsulu ola bilər.
Almaniyada gerçəkləşdiriləcək təqdimat yerli vaxtla 16:00-da başlayacaq. Linkə keçid edərək (Huawei canlı yayın) təqdimatı canlı olaraq izləyə biləcəksiniz.