Menu

AZ EN RU
Əsas Xəbərlər Marcom Xəbərləri Marcom Krizis Kommunikasiya Planına Uyğun Fəaliyyət Göstərir.

Marcom krizis kommunikasiya planına uyğun fəaliyyət göstərir.

2020-08-11

Krizis kommunikasiya planını 2 il əvvəl doğru şəkildə qurmağı bacaran Marcom Marketinq və Kommunikasiyalar şirkəti pandemiya dövründə bazardakı mövqeyini qoruyub saxlamağa nail olub.

Şirkətin icraçı direktoru Ceyhun Fərzəliyevin sözlərinə görə 2018-2019-cu illərdə yaratdıqları xidmətlər hal-hazırda şirkətlərin ən çox axtardıqları xidmətdir.

“Bizim üçün bazarda alternativ xidmətlərin yaradılması məsələsi hər zaman aktual olub. Biz təkcə bazar iştirakçılarının bu günkü marketinq gedişlərini deyil, həmçinin onların gələcəkdə üzləşə biləcəyi riskləri də analiz etməyə çalışırıq. Bu bizə həmin vəziyyətlər üçün yeni xidmətlər formalaşdırmağa kömək edir. Təcrübə göstərdi ki, 2015-ci il və ondan sonrakı illərdə dünyada, o cümlədən ölkədə baş verən maliyyə böhranı zamanı şirkətlərin böyük əksəriyyəti ilk növbədə marketinq xərclərini ciddi şəkildə azaltmağa, o cümlədən həmin departamentdə çalışan əməkdaşlarını ixtisar etməyə başladılar. Bu da həmin şirkətlərin bazardakı mövqeyinə ciddi şəkildə təsir etdi. Özünü bərpa prosesi isə həm uzun vaxt, həm də böyük büdcə bahasına başa gəldi. Şirkətlərdə bu kimi proseslərin təkrarlanmaması üçün biz krizis kommunikasiya planı çərçivəsində outsors (outsource) marketinq, marketinq audit, kontent marketinq kimi xidmətləri formalaşdırdıq.

Ceyhun Fərzəliyev şirkətlərin öz daxilində marketinq departamenti saxlamaq dövrünün bitmiş olduğunu bildirib.

“Bu gün marketinq departamenti saxlamaq kiçik və orta şirkətlər üçün əlavə xərc, zaman itkisi və riskdir. Apardığımız araşdırmalar göstərir ki, bir çox şirkətlər öz marketinq sahəsi üzrə çalışan əməkdaşlarının fəaliyyətlərindən narazıdırlar. Bunun da öz obyektiv və subyektiv səbəbləri vardır. Biz bu məsələləri təhlil edərək 2018-ci ildə outsors marketinq xidmətini bazara təqdim etdik. Bu xidmət şirkətlərə öz marketinq xərclərinə qənaət etməyə və şirkət daxilində marketinqə aid əməkdaş saxlamamağa imkan yaradır. Bir çox hallarda şirkətlər kadr seçimində yanlışlığa yol verir və ya yüksək əmək haqqı tələbinə görə lazım olan əməkdaşı öz şirkətinə transfer edə bilmir. Bu isə şirkətin bu istiqamətdə yanlış yol getməsinə və ya geriləməsinə səbəb olur. Outsource marketinq xidməti bu və digər neqativ halların baş verməsinin qarşısını alır. Outsource marketinq xidmətinin işləmə mexanizmi olduqca sadədir. Tərəflərarası görüş təşkil olunur. Görüşdə şirkətdə görülmüş və görüləcək işlər müzakirə olunur. Daha sonra görülmüş işlər audit olunaraq ümumilikdə görüləcək işlərin həcmi müəyyənləşdirilir. Şirkət üçün görüləcək işlər əsasında yol xəritəsi, xidmətlərin növləri, işlərin icra planı və illik qiymət cədvəli formalaşdırılır. Müştəriyə təqdim etdiyimiz qiymətlər şirkətin cari vəziyyətindən, auditin nəticələrindən və görüləcək işlərin həcmindən asılı olaraq dəyişə bilir. Bu xidmət müştərinin işlərini həm kompleks, həm də operativ şəkildə görülməsi baxımından daha əlverişlidir.

Şirkətin icraçı direktoru bir çox şirkətlərin pandemiya dövründə öz marketinq əməkdaşlarının işinin audit etdirməsi məsələsinə də toxunub.

“Şirkətlərin maliyyə auditi etdirməsi kimi marketinq departamentinin işini də audit etdirməsi normal bir prosesdir. Pandemiya dövründə bir çox şirkətlər marketinq istiqamətində görülmüş işlərin effektivliyini, doğruluğunu yoxlamaq üçün marketinq audit xidmətinə müraciət edirlər. Bu xidmət bir çox hallarda bazarda eyni sektor üzrə fəaliyyət göstərən bəzi agentlik və fiziki şəxslərlə aramızda gərginliklər yaratsa da, biz onlara məqsədimizin hər zaman bazarı və sahibkarları qorumaq olduğunu açıqlamışıq.”

Ceyhun Fərzəliyev bir çox bazar iştirakçılarının rəqəmsal marketinq erasına tam keçid edə bilməməsinin əsas səbəbinin kontent olduğunu vurğulayıb.

“Marketinqin bütün dövrlərində kontent hər zaman önəmli olub. Azərbaycanda pandemiyadan əvvəl bir çox şirkətlər daha çox oflayn kommunikasiya vasitələrinə fokus olmuşdular. İndi isə bu prosesin tam əksi müşahidə olunmaqdadır. Biz bunu öncədən diqqətə alaraq kontent marketinq xidmətini formalaşdırdıq. Bir şirkətin rəqəmsal marketinq alətlərindən tam və effektiv şəkildə faydalanması üçün ona ilk növbədə kontent lazımdır. Təsəvvür edin ki, Siz hər hansı bir məhsul və ya xidmətlər satırsınız. Bunun üçün Siz ilk növbədə müştəri davranışlarına və google standartlarına uyğun veb sayt qurmalısınız. Saytı qurmaq üçün isə dizayndan əvvəl Sizə ilk növbədə faydalı kontent generasiya etmək lazımdır. Bu xidmət gələcəkdə sosial media, google reklamları, google SEO xidməti kimi marketinq alətlərindən istifadə zamanı büdcənizə qənaət etməyə kömək edəcək.”

Qeyd edək ki, Marcom Marketinq və Kommunikasiyalar şirkəti Azərbaycan və Gürcüstanda fəaliyyət göstərir. Şirkət hər iki ölkə üzrə 31 marketinq xidmət təklif edir. Şirkəti həmçinin Avropa Yenidənqurma və İnkişaf Bankının (AYİB) marketinq məsələləri üzrə konsultantıdır.