Artıq əvvəlki marketinq alətləri bu günkü şirkətləri cəlb etmir. Marcom şirkətinin Satış departamentinin müdiri Taleh Kərimov-la müsahibə

İndiki bazar şərtləri ilə yeni müştərilər cəlb etmək asandır yoxsa mövcud müştərilərlə işləmək?

Bu gün güclü kadrlara sahib olmadan yeni müştərilər cəlb etmək olduqca çətindir. Artıq bir çox şirkətlər kiminlə işləyəcəklərinə daha çox diqqət etməyə başlayıblar. Daha əvvəlki kimi ənənəvi marketinq alətləri bu günkü şirkətləri cəlb etmir. Sifarişçilər artıq hədəf kütləsinə yönəlik və arxasında statistika olan təkliflər almaq istəyirlər. Bizdə öz növbəmizdə bizimlə əməkdaşlıqda maraqlı olan şirkətlərə əsaslandırılmış təkliflər hazırlamağa çalışırıq. Mövcud müştərilərə gəlincə isə hələki hər hansı bir çətinliklə üzləşməmişik. Əksinə onların hər addımlarında yanında olub müvafiq istiqamətlər verməkdə davam edirik.

Sizcə bu gün bazarda sifarişçi şirkətlər ilə marketinq xidməti göstərən şirkətlər arasındakı münasibətlər hansı mərhələdədir?

Hal-hazırdakı vəziyyət göründüyündən daha da acınacaqlıdır. Fəaliyyəti müvafiq qurumlar tərəfindən tənzimlənməyən bir çox agentliklər şirkətlərin bel sütununa ağır zərbə vurub və vurmaqda da davam edirlər. Həmin zərbələrdən sonra o şirkətləri doğru istiqamətə yönəltmək və etibarını qazanmaq bizim üçün olduqca çətindir. Digər tərəfdən də marketinq departamentinin olmaması və ya o işləri icra edən şəxslərin mövzudan xəbərdar olmaması işi daha da qəlizə salır. Şirkət olaraq dəfələrlə müxtəlif şirkətlərə getdiyi yolun onlara heç bir satış gətirməyəcəyini və brendin imicinə hər hansı bir müsbət təsirinin olmayacağını, müştəri brendə qarşı loyallıq yaratmayacağını məntiqi əsaslarla izah etmişik, qarşısına faktlar qoymuşuq.

Vəziyyətin daha da qəlizləşməməsi üçün bu sahə ilə məşğul olan və öz imicinə hörmət edən hər bir agentlik/şirkət qarşı tərəfi doğru şəkildə maarifləndirməlidir. Bu işdə təkcə mənfəət güdmək doğru deyil. Bazar hamımızındır və bu bazarın davamlı olması, şirkətlərin rifahı üçün hamılıqla çalışmalıyıq.

Ortaya keyfiyyətli iş çıxartmaq daha çox sifarişçi şirkətdən asılıdır yoxsa marketinq şirkətindən?

Burada hər iki tərəfin üzərinə kifayət qədər ciddi məsuliyyət düşür. Bəzən layihələrin icrası zamanı bu işdə heç bir təcrübəsi olmayan insanlar iştirak edirlər ki, bu da nəticə tərəflər arasında problemlərin yaranmasına gətirib çıxarır. İş prosesində yaranan çətinliklərdən biri də sifarişçinin nə istədiyini icraçı tərəfə düzgün çatdıra bilməməsidir. Bu məsələni sadələşdirmək və Sifarişçini doğru anlamaq üçün Marcom şirkəti olaraq müştərilərə müxtəlif brif formaları təklif edirik. Sifarişçi brifi doldurur, daha sonra biz həmin brifin doğru doldurulmasını yoxlayıb, müvafiq işlərə başlayırıq. Biz hər tamamladığımız layihənin sonunda müəyyən analizlər aparır, brif formalarını təkmilləşdiririk. Etiraf etməliyik ki, biz çox işlərin altına öz imzamızı qoymaqdan və ictimaiyyətə təqdim etməkdən qaçırıq. Buna səbəb isə müştərinin istəklərinin qeyri-peşəkar və bazarın tələblərinə uyğun olmamasıdır. Şirkətlər marketinq mütəxəssisi işə götürərkən və ya işi hər hansı bir marketinq şirkətinə verərkən, öz şirkətinin fəlsəfəsini izah etməklə ona tam şəkildə etibar etməlidir. Əks halda ortaya çıxacaq iş hər iki tərəfin imicinə mənfi təsir edəcək.